The Noiser (zaratazalea) izenaren azpian Julien Ottavi media-aktibista, artista, ikerlari, konposatzailea gordetzen da. Nantes hiriko Apo33 plataformako sortzaile eta kideak, soinu artea, bideoa, teknologia berriak eta gorputz performancea nahasten dituen sorkuntza lana jorratzen du. Azken hamarkadan bereziki ahotsa eta honen ordenagailu bidezko eraldaketa izan du ikergai Ottavik, software librea erabiliz eta bere gailu eletronikoak (irrati transmisoreak, osziladoreak, mixerrak...) sortuz. Horren haritik APODIO izeneko Linux distribuzioaren sortzaile nagusia da. Musikaren alorrean Formanex bezalako taldetan hartu du parte eta Jenny Pickett, Brandon Labelle, Keith Rowe, Kasper T. Toeplitz, Christian Galarreta, Zbigniew Karkowski, Randy Yau, Dion Workman edo Phill Niblock bezalako artistekin egin du lan.